АУДАНДАРДА МЕДИЦИНАЛЫҚ ҚЫЗМЕТТІҢ МҮМКІНДІГІ АРТУДА

НЕГІЗГІ ЖАҢАЛЫҚТАР| 22 шілде 2016 ж.

Сейсенбіде облыстық денсаулық сақтау басқар­масының ұйымдастыруымен аудандағы дәрігерлерік қызмет барысын жан-жақты таныстыруға арналған баспасөз туры өтті.

Шара аясында тілшілер қауымы алдымен Қармақшы аудандық емханасындағы жүкті әйелдерге арналған «жасыл дәліз» жұмысымен танысты.

Ана мен бала өлім-жітімінің жолын кесу, жүкті әйелдерге сапалы әрі қолжетімді медициналық көмек көрсетуді дамыту, олардың арасында кезек күту мәселесін болдырмау мақсатында арнайы ұйымдастырылған «жасыл дәліз» және жүкті әйелдерді тіркеу бөлімі бүгінде облыс орталығындағы емдеу-алдын алу ұйымдарында ғана емес, сонымен бірге аудан орталықтарындағы медициналық мекемелерде де жолға қойылған. Оны Қармақшы аудандық емханасына барған жұмыс сапарымызда байқадық.

– ҚР Денсаулық сақтау министрлігінің 2012 жылғы «акушерлік-гинекологиялық көмек көрсететін ұйымдардың қызметі туралы» бұйрығы негізінде жүкті әйелдерге көрсетілетін медициналық көмекті тиімді ұйымдастыру, ана мен бала өлімінің алдын алу мақсатында облыстық денсаулық сақтау басқармасының бұйрығымен «жасыл дәліз» және жүкті әйелдерді тіркеу бөлімі ұйымдастырылды. Ағымдағы жылдың маусым айынан бастап ашылған «жасыл дәліз» жұмысы бүгінде жолға қойылған. Емханаға келген жүкті әйел алдымен жүкті әйелдерді тіркеу бөліміне барады. Әйел ол жерде құжаты бойынша тіркеуге алынады, әйелге арналып жеке карта ашылады. Сонымен болашақ ана жасыл сызбамен көрсетілген бағыт бойынша жүріп отырып мамандарға барады. «Жасыл дәліз» жұмысы ашылған күннен бері 65 болашақ ана тіркелді– дейді аудандық емхана бас дәрігерінің орынбасары Сақып Кенжебаева.

Ауданда туберкулезбен аурушаңдық деңгейі бірқалыпты болса, жүрек-қан тамырлары ауруларының аурушаңдығы, онкология өткен жылмен салыстырғанда төмен деңгейде. Кезекте тұру мәселесін болдырмау мақсатында, жоғарыда айтып өткеніміздей, жүкті әйелдерге арналған, балаларға, ересектерге және диспансерлік науқастарға арналған бөлек тіркеу бөлімдері жұмыс жасайды. «Осының нәтижесінде емханада кезек күту мәселесі шешімін тапты», – дейді аудандық емхана бас дәрігері Жайлыбай Құдайбергенов. Бас дәрігердің айтуынша, аудандық емханаға балалар хирургі, акушер-гинеколог мамандары жетіспейді, сондай-ақ, логопед мамандарын тарту қажеттілігі де өзекті болып отыр.

Қазалы теміржол ауруханасының қызметі аудан халқына жақсы таныс. Ағымдағы жылдың ақпан айында аурухана базасынан нейроинсульт орталығының ашылуы тек қазалылықтарға ғана емес, сонымен бірге Қармақшы, Арал тұрғындары үшін де мол мүмкіндік болып отыр.

Баспасөз туры барысында тілшілер қауымы танысқан тағы бір емдеу-алдын алу мекемесінің бірі осы – Қазалы теміржол ауруханасында ашылған нейроинсульт орталығы болды.

Нейроинсульт орталығы 20 төсек-орынға арналған. Оның ішінде 4 төсек қарқынды емдеу бөлімі болса, 10-ы инсульт бөліміне арналған, тағы 10 төсек – нейрореабилитация. Орталықтың басты мақсаты бөлімшеге келген науқастарға жоғары дәрежелі медициналық көмек көрсету, диагноздарын анықтап, стандарттарға сәйкес сапалы ем жасау болып табылады. Орталық дәрігерлермен, мейірбикелермен және кіші буын медицина қызметкерлерімен толық қамтамасыз етілген. Яғни, онда бас-аяғы 15 қызметкер еңбек етсе, оның ішінде 8 дәрігер науқастарға мамандандырылған медициналық көмек көрсетуде.

– Орталық заманауи құрал-жабдықтармен толық қамтылған. Мәселен, тәуліктік мониторинг аппараттар, тыныс алу құралдары, электроотсос, дефибриллятор, электрокардиограф құрылғылары жұмыстың өз деңгейінде жүріп, науқас жағдайының жақсаруында үлкен маңызға ие. Облыстық медицина орталығынан кейін тек біздің орталықта ғана бар КТ,УЗИ аппараттары тәулік бойы жұмыс жасайды. Сонымен бірге науқастың сауығып кетуіне мол мүмкіндік беретін жаттығу залы, физиотерапиялық кабинетіміз қажетті құрал-жабдықтармен толық қамтылған, – дейді нейроинсульттік бөлімінің меңгерушісі Дастан Аманбай.

– Инсульттің геморрагиялық және ишемиялық түрлері бар. Ишемиялық инсульт алған жағдайда науқас үш сағат ішінде ауруханаға келіп үлгерсе, онда оны құтқарып қалу мүмкіндігіміз мол. Яғни, медикаментозды реперфузионды терапия жүргізіледі. Былайша айтқанда, дәрі егу арқылы науқастың тартылған аяқ-қолын, қисайған бет-ауызын қалыпқа келтіруге болады. Ал, басына қан құйылған жағдайда оның қаншалықты көлемде екені анықталған соң ота жасалады,–дейді орталық меңгерушісі Дастан Аманбай.

Орталық жұмысымен танысу барысында ишемиялық инсультпен түскен қазалылық Мейрамкүл Рүстемовамен әңгімелесудің сәті түсті. Елу жастағы Мейрамкүл ағымдағы жылдың 13 шілдесінде ауыр жағдайда ауруханаға жеткізілген. Дер уақытында келгендіктен мамандардың көмегі арқасында аман қалған.

– Ауруханаға ес-түссіз түстім. Бет-ауызым қисайып, аяқ-қолым жансызданып қалған. Осында келген соң дәрігерлер укол салды, әуелі Алланың, онан соң дәрігерлердің арқасында қазір жағдайым қалыпқа түсті. Сал болып жатып қаламын ба деген қорқынышта болдым. Бүгінде, міне, өздеріңіз көріп отырғандай, сөйлеп отырмын, аяқ-қолымды қозғалта аламын,– деп Мейрамкүл апа қуаныштан көзіне жас алды.

Құбыл Ршымбетов басшылық жасайтын Қазалы теміржол ауруханасы базасынан ашылған Қазалы, Арал, Қармақшы аудандарының тұрғындарын қамтитын бұл орталықтан ағымдағы жылдың алты айында 240-қа жуық науқас емделіп шыққан.

 

Айнұр БАТТАЛОВА.

http://syrboyi.kz/negizginews/8097-audandarda-medicinaly-yzmett-mmkndg-artuda.html

2016 жылы медициналық пойыздар жобасына 300 миллион теңге бөлінді

АСТАНА. ҚазАқпарат - 2016 жылы медициналық пойыздар жобасына 300 миллион теңге бөлінді. Бұл туралы бүгін «Самұрық-Қазына TRUST» әлеуметтік жобаларды дамыту қорының Басқарушы директоры - ресми өкілі Лима Диас мәлім етті.

Оның сөзіне қарағанда, Қазақстанда «Денсаулық», «Жәрдем» мен «Саламатты Қазақстан» атты үш медициналық пойыз қатынайды.

«Самұрық-Қазына» компаниялар тобы әлеуметтік жобаларды қаржыландыру аясында «Денсаулық», «Жәрдем» мен «Саламатты Қазақстан» атты үш медициналық пойыздарын жүзеге асыруға 300 миллион теңге бөлінді», - деді Л.Диас.

Оның айтуынша, «Қазақстан темір жолы» ҰК» АҚ жобаның техникалық қамсыдандырылуын қамтамасыз етті, ҚР ІІМ төтенше жағдайлар комитеті өңірлерде халыққа қызмет көрсететін мамандарды тартып отыр.

Баспасөз мәслихатында, пойыздар халық арасында үлкен танымалдылыққа ие.

Мәселен, «Жәрдем» диагностикалық пойызы арқылы биыл 23 мамыр мен 25 шілде аралығында Батыс Қазақстан облысының 6943 тұрғыны медициналық тексеруден өткен.

ФОТО: Виктор Федюнин © 2016 «ҚазАқпарат»

Автор:Жасұлан Жолдыбаев

http://inform.kz/kaz/article/2929341

«Денсаулық» пойызы Шиелі ауданына келді - Қызылорда облысы

ҚЫЗЫЛОРДА. ҚазАқпарат - «Денсаулық» пойызы 8-14 шілдеде Шиелі ауданында болды, осы аралықта 600-ден астам тұрғынынға медициналық көмек берілді.

Шиелі ауданы бойынша медициналық «Денсаулық» пойызының бас дәрігері - Тұңғышбаев Қанат. Пойыздың медициналық қызмет көрсету құрамында барлығы 17 қызметкер жұмыс жасады, оның ішінде 7-дәрігер, 9-мейірбеке және 1-компьютер бағдарламашысы бар. Сонымен бірге, медициналық пойызда невропатолог, терапевт, хирург, кардиолог, гинеколог, флюрография, эндоскопия, ЛОР, педиатр, окулист, стоматолог, УЗИ дәрігерлері және биохимиялық, клиникалық лаборатория қызмет атқарды.

8-14 шілдесінде Шиелі ауданы Сұлутөбе, Майлытоғай, Тартоғай, Бәйгеқұм, Бала би, Жөлек, Ортақшыл, Жуантөбе кентінің 600-ден астам тұрғынына 5 485 медициналық қызмет көрсетілді. Тұрғындар негізінен қан қысымы, жүрек ауруы және көз ауруы туралы көбірек шағымданған. 19 шілдеге дейін аталмыш медицицналық поездың мамандары Жаңақорған ауданы Екпінді, Төменарық, Жаңақорған, Аққұм, Талап, Бесарық, Сауран, Шорнақ стансалары тұрғындарына медициналық көмек көрсететін болады.

Еске сала кетсек, «Нұр Отан» партиясының бастамасымен ҚР ТЖМ «Апаттар медицинасының темір жол госпитальдары» АҚ, «Қазақстан темір жолы» АҚ және Қазақстан Республикасының Денсаулық сақтау министрлігі бірлесіп, емдеу-диагностикалық пойыздарын құру жобасын іске асырды. Жобаны жүзеге асыру 2010 жылы «Денсаулық» емдеу-диагностикалық пойызын іске қосудан бастау алды. 2011 жылдың басында «Жәрдем» екінші медициналық пойызы өз жұмысын бастады. Жобаның негізгі мақсаты - еліміздің шалғай аймақтарының тұрғындарына медициналық жәрдемді қол жетерліктей ету және ірі көлемдегі төтенше жағдайлардан зардап шеккендерге мамандандырылған медициналық жәрдем көрсету болып табылады.

http://www.inform.kz/kaz/article/2925815

Маңғыстау облысында «Жәрдем» медициналық пойызы 13 станса тұрғындарына қызмет көрсетеді

АСТАНА. ҚазАқпарат - 10 шілдеден бастап «Жәрдем» кееестік-диагностикалық пойызы Манғыстау облысының тұрғындарына медициналық көмек көрсетуде. Бұл туралы ҚР ІІМ ТЖК баспасөз қызметі хабарлады.

«Жәрдем» пойызының медицина мамандары Батыс Қазақстан облысының шалғай елді мекендеріндегі 9 стансаның және Атырау облысының 13 стансасының тұрғындарын тексеріп оларға жәрдем берді.

Аудан орталығына тоқтаған пойыз ішіндегі ақ халатты абзал жандар көмекке зәру жандардың сұранысын қанағаттандырды. Таңертеңнен бері пойызға ағылған халық толастар емес. Себебі дертіне шипа іздеген жандарға бұл пойыз шипаханаға айналды. Әсіресе алыс шалғайдан арнайы дәрігерлік қаралуға келе алмайтын жандар, еңбектеген баладан еңкейген ақсақалға дейін ауылына келген жәрдемнен құр қалмауға тырысады. Дәрігерлік көмекке жүгінгендердің көбісі аяғы ауыр әйелдер мен жас балалар. Себебі пойыз заманауи медициналық құралдармен жабдықталған.

2016 жылдың 1 жартыжылдығында «Жәрдем» кенестік-диагностикалық пойызымен 37 күн ішінде Батыс Қазақстан және Атырау облыстарының 20 стансасының тұрғындары тексерілді, 4 454 ересек тұрғын, сонымен қатар 376 балаға медициналық көмек көрсетілді. Дәрігерлерге келушілер саны 37 217 адамды құрады. 15 635 диагностикалық зерттеулер жүргізілді (4 744 ішкі ағзаны ультрадыбыстық зерттеу, 1 211 миды электроэнцефалографиялық және ультра дыбыстық доплерографиялық зерттеулер, 1 856 электрокардиографиялық зерттеулер, 1 234 көз ішінің қан қысымын өлшеу, 672 эзофагогастродуоденоскопия, 5 918 клинико-биохимиялық зерттеулер). 1 106 тұрғынға стоматологиялық жәрдем көрсетілді.

Жүргізілген жұмыс нәтижесінде пойыз мамандары 8 998 ауру түрін тіркеді, оның ішінде 813-і балаларда. 215 ісік анықталды, оның ішінде 5-уі балаларда.

12 шілдеде «Жәрдем» медициналық пойызы Маңғыстау облысы Өзен стансасының тұрғындарына көмек көрсетіп жүр, ал 15 маусым күні пойыз Жетібай стансасына мамандандырылған медициналық көмек көрсету мақсатында 3 күнге аялдайды. Осы сапарында барлығы Маңғыстау облысының 13 стансасына қызмет көрсету жоспарланған.

http://www.inform.kz/kaz/article/2924646

"Арманы алдамады"

Денсаулық сақтау ұйымдарында ақылы қызметтер көрсету қағидалары мен шарттары бекітілді

АСТАНА. ҚазАқпарат - Қазақстан Республикасы Денсаулық сақтау және әлеуметтік даму министрлігінің бұйрығымен Денсаулық сақтау ұйымдарында ақылы қызметтер көрсету қағидалары мен шарттары бекітілді.

Қазақстан Республикасы Денсаулық сақтау және әлеуметтік даму министрлігінің бұйрығы

2015 жылғы 30 сәуір №304 Астана қаласы

Денсаулық сақтау ұйымдарында ақылы қызметтер көрсету қағидалары мен шарттарын бекіту туралы

«Халық денсаулығы және денсаулық сақтау жүйесі туралы» 2009 жылғы 18 қыркүйектегі Қазақстан Республикасы Кодексінің 7-бабы 1-тармағының 87) тармақшасына сәйкесбұйырамын:

1. Қоса беріліп отырған Денсаулық сақтау ұйымдарында ақылы қызметтер көрсету қағидалары мен шартта- ры бекітілсін.

2. Қазақстан Республикасы Денсаулық сақтау және әлеуметтік даму министрлігінің Қаржы департаменті:

1) осы бұйрықты Қазақстан Республикасы Әділет министрлігінде мемлекеттік тіркеуді;

2) осы бұйрық Қазақстан Республикасы Әділет министрлігінде мемлекеттік тіркелгеннен кейін күнтізбелік он күн ішінде оны мерзімді баспа басылымдарында және «Әділет» Қазақстан Республикасы нормативтік құқықтық актілерінің ақпараттық-құқықтық жүйесінде ресми жариялауға жіберуді;

3) осы бұйрықты Қазақстан Республикасы Денсаулық сақтау және әлеуметтік даму министрлігінің ресми ин- тернет-ресурсында жариялауды қамтамасыз етсін.

3. Осы бұйрықтың орындалуын бақылау Қазақстан Республикасының Денсаулық сақтау және әлеуметтік даму вице-министрі А.В. Цойға жүктелсін.

4. Осы бұйрық оны алғаш ресми жариялаған күнінен кейін қолданысқа енгізіледі.

Қазақстан Республикасының Денсаулық сақтау және әлеуметтік даму министрі Т.ДҮЙСЕНОВА

Қазақстан Республикасы Денсаулық сақтау және әлеуметтік даму министрінің 2015 жылғы 30 сәуірдегі №304 бұйрығымен бекітілген

Денсаулық сақтау ұйымдарында ақылы қызметтер көрсету қағидалары мен шарттары

1. Жалпы ережелер

1. Осы Денсаулық сақтау ұйымдарында ақылы қызметтер көрсету қағидалары мен шарттары (бұдан әрі - Қағидалар) «Халық денсаулығы және денсаулық сақтау жүйесі туралы» 2009 жылғы 18 қыркүйектегі Қазақстан Республикасының Кодексіне сәйкес әзірленді және денсаулық сақтау ұйымдарында ақылы қызметтер көрсету тәртібі мен шарттарын айқындайды.

2. Ақылы медициналық қызметтер медициналық қызметтерді тұтынушылар болып табылатын жеке тұлғаларға (бұдан әрі - пациенттер) көрсетіледі.

3. Осы Қағидаларда мынадай ұғымдар пайдаланылады:

ақылы бөлімшелер (палаталар) - денсаулық сақтау ұйымдарында ақылы негізде ТМККК-ге кірмейтін медициналық қызметтерді көрсетуге арналған бөлімшелер (палаталар);

ақылы қызметтер - ТМККК-ге кірмейтін, пациенттердің жеке қаражаты, жұмыс берушінің, ерікті медициналық сақтандыру жүйесінің қаражаты есебінен, Қазақстан Республикасының заңнамасында тыйым салынбаған басқа да көздерден ақы төленетін қызметтер;

денсаулық сақтау ұйымы - денсаулық сақтау саласындағы қызметті жүзеге асыратын заңды тұлға;

тегін медициналық көмектің кепілдік берілген көлемі (бұдан әрі - ТМККК) Қазақстан Республикасының азамат тарына және оралмандарға көрсетілетін медициналық қызметтердің тізбесі бойынша Қазақстан Республикасының Үкіметі айқындайтын медициналық көмектің бірыңғай көлемі.

2. Ақылы қызметтер көрсету тәртібі

4. Ақылы медициналық қызметтерді мемлекеттік және жеке меншік медицина ұйымдары аурудың бейіні мен медициналық қызметпен айналысуға мемлекеттік лицензиясы сәйкес келген кезде көрсетеді.

5. Ақылы қызметтердің түрлері және олардың баға прейскуранты медицина ұйымдарындағы көрнекі ақпарат арқылы халықтың назарына жеткізіледі. 6. Азаматтарға ақылы қызметтер көрсету кезінде есеп және есептілік құжаттамасын жүргізу Қазақстан Республикасы Денсаулық сақтау министрінің міндетін атқарушының «Денсаулық сақтау ұйымдарының бастапқы медициналық құжаттама нысандарын бекіту туралы» 2010 жылғы 23 қарашадағы № 907 бұйрығымен (Қазақстан Республикасы нормативтік құқықтық актілерді мемлекеттік тіркеу тізілімінде № 56272 болып тіркелген) бекітілген нысандар бойынша жүзеге асырылады.

7. Денсаулық сақтау ұйымдары ақылы негізде медициналық көмек алған пациенттерге:

1) амбулаториялық-емханалық көмек көрсеткен кезде тиісті медицина қызметкерлерінің қорытындысын;

2) стационарлық, стационарды алмастыратын көмек көрсету, қалпына келтіру емі және медициналық оңалту кезінде ауру тарихынан үзінді көшірме;

3) көрсетілген медициналық көмекке жұмсалған шығыстар туралы ақпарат ұсынады.

8. Ақылы медициналық қызметтер денсаулық сақтау ұйымдарында ақылы қызметтер көрсетуге арналған шарт негізінде көрсетіледі.

9. Мемлекеттік денсаулық сақтау ұйымдарында ақылы қызметтердің бағалары медициналық, сервистік қызметтер көрсетуге байланысты барлық шығындар және өзге де қосымша шығыстар ескеріле отырып айқындалады және жарты жылда бір реттен артық қайта қаралмайды. Ақылы қызметтерге баға ТМККК арналған бюджеттік бағдарламалар әкімшісі белгілейтін ұқсас медициналық қызмет тарифінен төмен белгіленбейді.

3. Ақылы қызметтер көрсету шарттары

10. Денсаулық сақтау ұйымдары ақылы қызметтер көрсетуді мынадай жағдайларда:

пациенттердің бастамасы бойынша, оның ішінде бастапқы медициналық-санитариялық көмек көрсету және денсаулық сақтау ұйымдары мамандарының жолдамасынсыз диагностикалық және емдеу қызметтерін көрсеткенде;

емдік формулярға енгізілмеген емдік құралдармен емдегенде;

ТМККК-ге кірмейтін медициналық зерттеулер жүргізгенде;

тиісті жолдамасыз санаторийлік емдеуде;

медициналық көрсетілімдерсіз медициналық-генетикалық зерттегенде;

жұмысқа орналасу және оқуға түсу үшін азаматтарды медициналық тексеріп-қарағанда;

ұйыммен шарт бойынша, оның ішінде ерікті сақтандыру бойынша медициналық көмек көрсеткенде; қосымша сервистік қызметтер көрсеткенде жүзеге асырылады.

Бұйрық Қазақстан Республикасының Әділет министрлігінде 2015 жылғы 12 маусымда Нормативтік құқықтық кесімдерді мемлекеттік тіркеудің тізіліміне №11341 болып енгізілді.

http://www.inform.kz/kaz/article/2918589

ДӘРІГЕР БЕДЕЛІ ҚЫМБАТ

Елімізде маусым айының екінші жексенбісі Медицина қызметкерлерінің күні ретінде аталып өтеді. Осынау кәсіби мерекеге орай газет тілшісі «Сыр медицинасы» облыстық қоғамдық бірлестігінің төрағасы Мұхтар Беисовпен әңгімелескен болатын.

–Облыстың ден­сау­­лық сақтау саласында қырық жылдай қызмет еткеніңізді білеміз. «Сыр медицинасы» қоғамдық бірлестігін құруға не себеп болды?

– Ақтөбе мемлекеттік медицина институтын осыдан тура қырық жыл бұрын «балалар дәрігері» мамандығы бойынша бітірдім. Еңбек жолымның көп бөлігі басшылық қызметте өтті. Қызылорда қалалық біріккен балалар ауруханасы, облыстық наркологиялық орталық, қалалық №2 және №4 емханаларда бас дәрігер болдым. Зайыбым Үрмия да дәрігер. Бір сөзбен айтқанда, дәрігерлер отбасымыз.

Адам денсаулығына медицинаның қатысы тек оннан бір бөлігі ғана. Мұны ресейлік ғалым Лисицын дәлелдеген.Соған қарамастан, бәрі дәрігердің қолында тұрғандай, медицина қызметкерлеріне алғыспен қатар сын да айтылады. Ел алдындағы дәрігер беделі сәл ақсағанын да мойындаймын. Десек те, бәрінен де дәрігер беделі қымбат.

Дәрігерлер қауымында өз салалары бойынша бірлестіктер жеткілікті. Олардың көбісі облыстағы филиал ғана. Үкіметтік емес ұйым құрып, облыс медицина қызметкерлерінің өзекті мәселелерін шешуге осындай бір бірлестіктің қажеттігін өмір көрсетті. Бұл идеяны әріптесім Серікбай Смағұлұлы берген болатын.

Бірлестіктің бұлай аталуының себебі бар. Аймақ медицинасының абыз ақсақалы, республикаға еңбегі сіңген дәрігер Ернияз Омаров пен дәрігер Серікбай Смағұлұлы бірлесіп жазған облыстың денсаулық сақтау саласының 1,5 ғасырлық тарихын қамтыған кітаптың аты «Сыр медицинасы» екенін ескердім.

– Бірлестік қызметінің мақсаты қандай?

– Сыр өңірі медицина қауымының бай дәстүрі бар. Басты мақсат – сол дәстүрді жалғастыру, облыс медицина қызметкерлерінің беделін арттыру. Сондай-ақ, тың жобалар мен бағдарламаларды жүзеге асыру, дәрігерлер мен орта буын медицина қызметкерлерінің біліктілігін арттыруға жәрдемдесу, түйткілді мәселелерді шешуге атсалысу, құқықтық кеңес беру, облыс көлемінде жеке медицина қызметінің дамуына ықпал ету және олардың құқықтарын қорғау, облыс медицинасына қазіргі заманғы озық технологияларды енгізуге ықпал ету.

– Атқарылған жұмыстарға тоқталсаңыз...

– Бірлестіктің құрылғанына осы маусым айында бір жыл болады. Өткен жылы оның жұмысы туралы барлық аудан орталықтарында болып, әріптестерімізді толық ақпараттандырдық. Бүгінде бірлестікке 6 мыңдай адам мүше. Біздің басқа бірлестіктерден айырмашылығымыз, тіркеуден өткен «Сыр медицинасы» атты газетіміз бар. 3000 таралыммен тарайтын газет айына екі рет шығады. Облыс медицинасының төл газетіне биыл 20 жыл толады. Сондай-ақ, өз ісін абыройлы атқарып, ел құрметіне бөленіп жүрген медицина қызметкерлерін ынталандыру мақсатында бірлестіктің «Сыр медицинасының үздігі» медалін тағайындап, онымен он бес адамды марапаттап үлгірдік. «Интернет» желісінде бірлестіктің жеке ресми сайты тұрақты жұмыс істеуде.

– Қазіргі денсаулық сақтау саласының дамуы қалай?

– Біз қатарлы ұрпақ институтты тегін оқып, стипендия алды, жатақханада тұрды. Ол кездегі ақпарат көзі тек кітап болатын. Сосын әр бес жыл сайын білім жетілдіріп отыратын. Бүгінде бәрі өзгерді. Медициналық орта және жоғары оқу орнында ақы төлеп оқиды. Оның ықпалының қандай болатыны алдағы кездің еншісінде.

Медицина қызметкеріне қажет ақпарат көзі жетерлік. Дегенмен, әрбірі бос уақытында өз бетінше білімін жетілдіріп отырса, құба-құп болар еді. Өйткені қазіргі медицинаның даму қарқыны өте жоғары. Көптеген әріптестеріміз тіпті шет елден білім алып, біліктілігін арттыруда. Мұндай біздің қиялымызға да кірмейтін.

Дәрігерлер әлі де қағазбастылықтан арыла алмай жүр. Денсаулық сақтау саласында да реформалар көп. Олардың нәтижелерін уақыт көрсете жатар.

Біздің кезімізде адамның тәнін оқытты. Ал адам онымен қоса жаннан да тұрады ғой. Әріптестеріме сырқат адамның жанын түсіну жағына көбірек ден қойса деп ойлаймын. Сол үшін өз газетімізде медициналық психология, қарым-қатынас өнері сияқты мәселелерге көбірек мән береміз. Бұл тақырыпта семинар-сабақтарды да өткіздік.

Облыстың аға газетінің мүмкіндігін пайдалана оты­рып, бірлестік атынан Сыр өңірінің барлық медицина қызметкерлерін төл мерекелерімен құттықтаймын. Олардың кәсібіне береке, өздері мен отбастарына мықты денсаулық тілеймін.

– Әңгімеңізге рахмет!

Әңгімелескен

Бақтыбай БЕРДІБАЕВ

«Сыр бойы» газетінен

Қаратереңдегі кездесу

http://www.halyk-gazeti.kz/index.php?option=com_content&view=article&id=5703:2016-06-07-10-35-04&catid=2:2011-11-18-08-59-27&Itemid=2

Ауруханадағы мемлекеттік рәміздер бойынша атқарылған жұмыстар

1992 жылғы маусым айының 4-ші жұлдызы ҚазақстанРеспубликасы тарихындағы ерекше мәртебелі күн. Бұл күн еліміздің мемлекеттік рәміздері-Туы, Елтаңбасы, Әнұраны- дүниеге келген күн ретінде мәңгі есте қалады.

Мемлекеттік рәміздер - бұл кез келген мемлекеттің егемендігі мен біртұтастығын бейнелейтін, оның ажырамас атрибуттарының бірі.

«Апаттар медицинасының госпитальдары» Акционерлік қоғамының филиалы - « Қазалы теміржол аурханасы» мемлекеттік рәміздерді қолдану және пайдалану тәртібі бойынша іс-шаралар белгілеп, жұмыстар жүргізді.

Мемлекеттік рәміздерге деген жалпы халықтың құрметін арттыру және жастарға оның маңыздылығын түсіндіру мақсатында насихат жұмыстары күшейтілді.

Қазақстан Республикасының Мемлекеттік Туының және Мемлекеттік Елтаңбасының бейнелері, Мемлекеттік Гимннің мәтіні мекеменің салтанатты шаралар өтетін мәжіліс залының арнайы жерінде бір деңгейде, ретімен орналастырылған.

Мекеме басшысының бұйрығымен ұлттық стандарттарға сәйкес келмейтін Қазақстан Республикасының Мемлекеттік Туын, Мемлекеттік Елтаңбасын ауыстыру және жою ережесі негізінде мекемеішілік тұрақты комиссия құрылған.

Аурухананың ресми веб-сайты мемлекеттік рәміздерге арналған Қазақстан Республикасының Заң талаптарына сәйкес бақыланады.

Қазақстан Республикасының Мемлекеттік Туы мемлекеттік лицензиясы бар заңды тұлғалар арқылы сатылып алынады, аурухана ғимаратында ұдайы ілініп тұрады, сондай-ақ салтанатты және спорттық іс - шаралар кезінде тігіледі. Мемлекеттік Ту ұлттық стандартқа сәйкес келеді, жарамды күйде, сапасы жақсы, қолдану тәртібі қатаң сақталады. Ауа райының қолайсыздығын ескеріп, 2016 жылы мекеме бойынша 15 дана Мемлекеттік Ту алуға қаржы бөлу қарастырылды.

Қазақстан Республикасының Мемлекеттік Елтаңба бейнесі аурухананың мөрі мен құжаттарының бланкілерінде орналастырылған, көлемі ұлттық стандартқа сәйкес келеді.

Қазақстан Республикасының Мемлекеттік Гимні ұлттық және мемлекеттік мерекелеріне, өзге де салтанатты іс-шаралардың ашылу кезінде бекітілген мәтіні мен музыкалық редакциясына сәйкестікпен мемлекеттік тілде орындалады және орындалу тәртібінің қатаң сақталуы бақыланады.

Сурет kaztv.kaztrk.kz сайтынан алынды

С. ЕРДАЛИЕВ

Адамның өмірі – әлемнің тынысы

Мамыр айының 17 жұлдызында дүниежүзі елдерінде пульмонолог-дәрігерлер өзіндік кәсіби мерекесін тойлайды. Тұмау, баспа, пневмония, бронхит, өкпе қабынуы, демікпе секілді тыныс алу жолдарының ауруларын емдеуге ат салысатын дәрігерлер қауымын пульмонолог деп атайды. Ал әлемнің кей мемлекеттерінде пульмонология саласын респираторлы медицина ретінде атау да таңсық жайт емес.

Бұл мереке алғаш 1997 жылы атап өтілді. Сол уақыттан бері жыл сайын 17 мамырда пульмонологтар және олармен кәсібі жағынан тығыз байланысты терапевтер мен реаниматологтар мақтау қағаздарымен марапатталып, сый-құрметке лайықты деп танылады. Осы күні бүкіл әлем бойынша ғылыми конференциялар мен семинарлар, телевизия және радиоэфирлерде арнайы дәрістер мен пульмонология саласының жетістіктері жайлы түрлі бағдарламалар өткізіледі.
Адамның тыныс алу мүшелері – өмір сүру үшін аса қажетті функционалды органдар болып табылады. Сол себепті оны күтіп ұстау керек-ақ. Зауыт-фабрикалар, көліктерден шығатын түтіндер мен лас ауа өкпе жұмысын ауырлата түседі, ал темекі шегуге құмарлық тыныс алу жолдарын мүлде бөгемек.Денсаулыққа салғырт қараудың аяғы өкпе туберкулезіне шалдықтырады. Сонымен қатар суықта өзін-өзі күтпеудің соңы тұмаумен ғана шектелмей, бронх демікпесі, пневмониямен не болмаса бронхитпен жалғасады. Ал денсаулығына салғырт қарайтын науқастар дер кезінде дәрігерге қаралмаса, мұндай аурулар тізімі өкпе обырына(рагіне) әкелмесіне кім кепіл?
Көрдіңіз бе, жай ғана суықта жылы күтінбеу немесе темекіге құмарлық адам өмірін қаншалықты құртпақ? Осыған қарамастан қарапайым тұмаумен шатастырып, дәрігер қарауына асқынған сәтте бірақ баратындар пульмонолог дәрігерлер жайында тіптен хабарсыз. Көп жағдайда олар өздерінің емдеуші терапевт дәрігерлеріне жолығып, тек содан кейін арнайы мамандарға жолдама алады.
Адам физиологиясының күрделі органдарына жауапты дәрігерлердің еңбегін бағалап, оларға құрмет көрсету мақсатында атаулы мерекелік шара енгізілген еді. Себебі пульмонолог-дәрігерлер тыныс алу мүшелерінің қызметін, оның анатомиясын жан-жақты зерттеп, алдын-алу мен емнен кейінгі шараларға жауапты. Ақ халаттылар мойнында сан мың адам тағдыры жатыр. Ал мұндай ауыр жүкті көтеріп жүру медицинадағы пульмонология саласының қызметкерлеріне тиісті міндет екенін ұмытпайық!

Автор: Назерке ТЛЕУБАЕВА

http://www.zhardem.kz/news/1463718190.html