Табысқа жетудің кілті – басқару психологиясын білуде
Облыс орталығынан шалғай орналасқан
аудандардың бірінде болғанымен, өз әлеуеті бойынша облыстағы іргелі алдын
алу-емдеу мекемелерімен терезесі тең дәрежеде медициналық қызмет көрсетіп келе
жатқан емдеу орындарының бірі - «Апаттар медицинасының теміржол госпитальдары»
Акционерлік Қоғамының филиалы «Қазалы теміржол ауруханасы». Аурухананың табысқа
жетуінде басшының ұйымдастырушлық қабілетінің, оның басқару психологиясын
қаншалықты меңгеруінің рөлі зор. Осы ретте филиал директоры, жоғары санаттағы
денсаулық сақтау ісін ұйымдастырушы, бірнеше мемлекеттік марапат иесі Құбыл Ршымбетовтен практикалық
психология, оның ішінде басқару психологиясы туралы ой бөлісуін өтінген едім.
Екеуара болған қысқаша сұхбатты газет оқырмандарының назарына ұсынамын.
-Құбеке, сіздің өміріңіздегі және мекеменің табысқа жетуіндегі психологияның алар орны қандай?
-Өзің білесің, жоғары болсын, орта болсын, біз оқыған кездегі медициналық оқу орындарында психологияға, оның ішінде медициналық психологияға жете көңіл бөлінген жоқ. Тек қазір ғана, онда да бірінші курста "коммуникативтік негіздер” бойынша дәріс оқылады.
Біз тек адамның тәнін ғана терең оқыдық. Ал жан мәселесімен психиатрия айналысады деп мән берілмеді. Онда да оның патологиясымен, яғни бүлінуімен. Алайда адам тек тәннен емес, жаннан да тұрады ғой. Оның бір-біріне әсері орасан зор. Бір кездері менің рефлексотерапиямен (ел арасында "алтын ине” деп аталады) шұғылдануыма тура келді. Онда мықты денсаулықты жан мен тәннің тепе-теңдігі, яғни гомеостазы деп қарастырады. Мен өз басым психологияға қатты қызығамын. Оны мүмкіндігімше өз өмірімде, қызметімде пайдалануға тырысамын.
-Оныңыз рас. Облыстағы қаншама алдын алу-емдеу мекемелерінің басшыларының арасында сіз ғана "Сыр психология әлемі” газетінің мәнін түсініп, өз қызметкерлеріңізге арнап жыл сайын 100 дана газетке қаржы бөліп, жаздырып аласыз. Бұл әрекетіңіз олардың да психологияға қызығуын тудыруды көздеуден туған болар...
-Иә, әрбір дәрігер өз алдына келген науқастың тәнін ғана емес, жанын да емдеуге тырысуы керек. Сол үшін ауруханада психолог маманын да ұстап отырмын. Апаттар медицинасында психологиялық шұғыл жағдайларда сауатты психологиялық көмек көрсету аса қажет. Сен шығаратын газетте шет елдік психологияның озық тәсілдері қазақ тілінде баяндалады. "Медициналық психология” айдарымен берілетін материалдардың кез келген медицина қызметкеріне берері мол деп есептеймін. Сондай-ақ ауруханаға келген кездеріңде өзің жүргізген практикалық психология бойынша семинарларың да қызықты.
-Құбеке, өзіңіздің тікелей қызметіңізбен байланысты басқару психологиясы туралы жеке пікіріңізді білсек...
-Менің өмірімнің басты бөлігі басшылық қызметте өтіп келеді. Егер басшының басқару психологиясынан мағлұматы болмаса, оның мекемесінің табысқа жетуі қиынырақ. Басқару психологиясының кейбір қыр-сырын өмірден терең ұқтым. Әрине, теория да керек. Ал практика мықтырақ. Бүгінде "айқайлап, бақырып бастық бола алмайсың”. Өз қызметкерлеріңді ортақ іске жұмылдыру, олардың ықпалды жұмыс істеуіне жағдай жасау, жан дүниесін, ішкі сарайын түсіну, сапалы жұмыс істеуге түрткі жасау және т.б. тәсілдердің қолданылуы қажет.
Өткен ғасырдың 90-шы жылдары қиын кезең еді ғой. Сол кезде темір жол желісінде бірнеше үй босады. Мен басшылардың көзін жеткізе отырып, жас маман дәрігерлеріме сол үйлерді алып бердім. Олар қазір мен басқаратын ауруханада табысты еңбек етіп жатыр. Сондай-ақ мекеме қаржысын жұмсап, жас мамандарды оқыту ісі де ойдағыдай жүруде. Олар оқуларын бітірген соң осы ауруханада қызмет ететін болады.
Кейде отбасында жағдайы жоқ қызметкерлердің үйіне өзім барып, отбасы мүшелерін түсіністікке шақырамын, оларға өз маманымның қаржы әкеліп отырғанын, оның жағдайы болмаса, жұмысына кедергі келетінін ұғындыруға тырысамын.
Әрине, ұжымдағы психологиялық ахуал күрделі және күрмеулі болса, оның жұмыстың ойдағыдай жүруіне үлкен көп кедергісі бар. Сол себепті кикілжіңді, дау-жанжалды реттеу техникасын, басқару психологиясының қазіргі заманғы жетістіктерін ізденіп жүріп меңгеремін.
-Әңгімеңізге рахмет! Жұмысыңызға табыс тілеймін.
С.СМАҒҰЛҰЛЫ,
Әйтеке би кенті,
Қазалы ауданы
"Сыр психология әлемі” республикалық газеті,
желтоқсан 2015 жыл
Аурухананың Тәуелсіздік жылдары қол жеткен табыстары (қысқаша шолу)
1904 жылы негiзi қаланған Қазалы темір жол
ауруханасының ел егемендігі жылдарында толағай табыстарға жетіп, Сыр өңіріндегі
іргелі емдеу-алдын алу ұйымының біріне айналғанының куәсі боламыз.
1996 жылы аурухана жаңа ғимаратқа көшіп, медициналық қызметтің аясы кеңіп, жаңа медициналық қызмет түрлерін практикаға енгізуге қол жетті. Осы жылдары жаңа үлгідегі ЭКГ, УДЗ, ФГДС, УЗДГ, ИФА, эндовидеолапароскопиялық аппаратура, барокамера, маммограф, КТ, ультрадыбысты доплерограф, гемодиализ, плазмаферез, нейрохирургиялық және травматологиялық операция жасауға арналған жабдықтар және т.б. алынып, емделушілерге көрсетілетін қызмет сапасы анағұрлым артты. Аурухана зертханасында жасалатын талдаулар ауқымы кеңейді, онда клиникалық-диагностикалық, бактериологиялық, биохимиялық, иммундық-ферменттік талдаулар атқарылады, бір атап өтерлігі,тіпті Қазалы ауданы ғана емес, көршілес Арал және Қармақшы ауданының тұрғындарына да лабораториялық көмек беріледі.
Жансақтау бөлімшесі орталықтандырылған оттегі беру жүйесімен, барокамера, инфузиялық шприц, насос аппараттары, басқа да озық технологиялармен жасақталған.
Бесінші квартал аймағында "Апаттар медициналық темір жол госпитальдары” АҚ Қазалы теміржол ауруханасының жаңа филиалы пайдалануға берілді. Бұған дейін тұрғындар үшін емхананың шалғайлығы күрделі мәселеге айналған болатын.
Аурухана 35-49 жас аралығындағы әйелдердің
сүт безі ауруларының алдын алу мақсатында Италияда шығарылған «Melodv» маркалы
мамограф аппаратымен, жүктіліктің 20 аптасынан бастап шарананың түрлі жұқпалы
аурулары мен кемістіктерін, сондай-ақ ересектер арасындағы түрлі жұқпалы
ауруларды анықтайтын т.б. функциялы Австрияда шығарылған ИФА аппараты, бас, ми
қабатының жабық және ашық жарақаттарынан кейінгі өзгерістер, бас, ми қысымының
жоғарылауы, жедел және ми қан айналысының, т.б. бірқатар қан тамырлары, қан
айналысының бұзылысы сипаттағы ауру түрлерін анықтайтын АҚШ-та жасалған
«Nicolet Companion» маркалы ультрадыбысты доплерограф аппараты, Жапондық сандық
УЗИ, гастрофиброскоп, плазмафарез, Ресейде жасалған заманауи үлгідегі
электрокардиограф аппараттары, Қытайда жасалған автоматты гемотологиялық
сараптама, жартылай автоматты биохимиялық сараптама т.б. жабдықтармен
қамтамасыз етілген.
Аурухана бөлімшелерін түгелдей айтпағанда, бір ғана ірі құрамдас бөлімі – хирургиялық бөлімшедегі ауыз толтырып айтарлық жетістіктерге қол жетті. Атап айтқанда, онда өт жолдарына, қарынға, тоқ ішекке және т.б. маңызды ағзаларға лапароскопиялық операциялар табысты жасалуда. Оған қоса жоғары мамандандырылған көмек – жамбас буынын ауыстыру, тізе, сан, иық сүйектерінің сынығындағы біріктіру операциялары жүргізілуде.
Операциялық блок екі залдан тұрады. Олар бейнелапароскопиялық құрылғымен, жалпы хирургиялық және травматологиялық аспаптар жиынтығымен жабдықталған.
Жылма-жыл "Денсаулық” поезы жылжымалы емхананың рөлін атқарып, медициналық қызметпен аз қамтылған аудан орталықтарынан алыс орналасқан елді мекен тұрғындарына білікті медициналық көмек алуға мол мүмкіндік береді. Мың жарым-екі мыңдай тұрғын заманауи талапқа сай медициналық қондырғылардан тексеруден өтіп, сала бойынша маманданған дәрігерлерден дертіне байланысты кеңес алады.
Емханада облыс орталығындағы емдеу мекемелерінде ғана кездесетін тар салаға маманданған дәрігерлер шоғарыландырылған. Бұл өз кезегінде емделушілерге алысқа бармай-ақ, білікті маманданған медициналық көмек алу мүмкіндігі деген сөз.
Ауруханада сондай-ақ 2008 жылдан ақылы емдеу бөлімінің қызметі жолға қойылды. 10 төсектік ақылы емдеу бөлімінде терапиялық, травматологиялық, неврологиялық науқастарды оңалту шаралары жасалады.
Аурухананың физиотерапия бөлімі 2010-2011 жылдары жаңа типті жабдықтармен жабдықталды. Сумен емдеу бөлімінде әртүрлі тұздармен, емдік шөптермен емдеу шаралары жүзеге асырылады. Емдік денешынықтыру бөлімі қажетті велосипед, жүгіру жол, швед қабырғасы және т.б. тренажерлермен қамтамасыз етілген.
2010 жылдан бастап компьютерлік бағдарлама және «Портал» арқылы ауруханаға жатқызу бағдарламасы арқылы жұмыс жасалуда. Аурухана бойынша өткізілетін медицианлық кеңестер, семинар-сабақтар мәжіліс залында – интербелсенді тақта арқылы өткізіледі.
Аурухана ғимаратына соңғы кезде күрделі жөндеу жұмыстары жүргізіліп, соның нәтижесінде емделушілерге көрсетілетін қызмет сапасы анағұрлым жақсарды.
Алтынкүл ДӘРІБАЕВА,
филиал директорының орынбасары
Аурухана жетістігі - республикалық басылымда
"Пожарный и спасатель" журналындағы "Хирургия қанат жайды" атты мақала.МЕДИЦИНАЛЫҚ КӨМЕКТІҢ АЯСЫ КЕҢЕЙДІ
Жуырда облыстық денсаулық сақтау басқармасы ұйымдастырған пресс-тур аясында БАҚ өкілдері Қазалы ауданында орналасқан емдеу орындарымен танысып қайтты. Ұлттық хирургия орталығының дәрігерлері - Қазалыда
ҚЫЗЫЛОРДА. ҚазАқпарат - А.Н.Сызғанов атындағы ұлттық хирургия орталығының дәрігерлері терапия саласының мамандары мен травматологтарға шеберлік сабағын өткізді, деп хабарлады Қазалы аудандық әкімдігінің баспасөз қызметінен.
«Денсаулық жолы - 2015» пойызы Қызылорда облысына келді
Астана. 26 тамыз. Baq.kz - «Денсаулық жолы - 2015» республикалық акция шеңберінде 2015 жылғы 24 және 27 тамыз аралығында жылжымалы медициналық кешендер Қызылорда облысы Қармақшы ауданы Тұрмағамбет ауылына, Қазалы ауданының Водокачка, Жалаңтөс ауылдарына және Шиелі ауданының 4 ауылына, сонымен қатар Жаңақорған ауданының шалғайдағы ауылдарына барады.Кампания құрамына терапевтер, кардиологтар, фтизиаторлар, онкологтар кіретін және салауатты өмір салтын қалыптастыру орталығы мамандары бар жұмылдыру топтарының қолдауымен ұйымдастырылатын болады.
25-27 тамыз аралығында ЖМК Ақтөбе облысының Айтеке би ауданына барады. Медициналық көмек жасөспірімдер, жастар, барлық меншік түріндегі ұйымдардың жұмыс берушілері және жұмыскерлері сияқты мақсатты топтарға көрсетіледі.
27 тамызда жылжымалы медициналық кешен Шығыс Қазақстан облысы Көкпекті ауданы Тассай ауылына барады.
Профилактикалық тексеру мен кеңестік-диагностикалық көмек көрсету мақсатында ШҚО Тарбағатай ауданының дәрігерлері жұмыс істейтін болады.
Ауыл тұрғындарына салауатты өмір салтын қалыптастыру мәселелері, әлеуметтік маңызды аурулар бойынша оқу-ақпараттық және тәжірибелік көмек көрсету мақсатында ағымдағы жылғы 1 шілде мен 31 тамыз аралығында республиканың барлық өңірінде «Денсаулық жолы - 2015» кең көлемдегі акция өтіп жатқанын естеріңізге саламыз.
ФОТО: ҚР ТЖК баспасөз қызметінен
http://baq.kz/kk/news/ult-sauligi/densaulik-zholi-2015-poiizi-kizilorda-oblisina-keldi-70564
Медицина қызметкерлерінің құқығын қорғайды
29
Шілде 2015
«Апаттар медицинасының темір жол госпитальдары» акционерлік қоғамы филиалы Қазалы темір жол ауруханасында медицина саласының қызметкерлері «Қызылорда облысы медицина қызметкерлерінің қауымдастығы» қоғамдық бірлестігінің өкілдерімен кездесті.
Өз жұмысын осыдан бірер ай бұрын бастаған қоғамдық бірлестіктің мақсаты облыстағы медицина қызметкерлерінің беделін арттыруға бағытталған идеяларды, жобаларды, бағдарламаларды жасау және жүзеге асыру, дәрігерлер мен аяжандардың біліктілігін арттыруға жәрдемдесу, оқу-клиникалық орталығын ашу, медицина қызметкерлерінде туындаған түйткілді проблемаларды шешуге атсалысу, құқықтық кеңес беру, жеке және дәстүрлі емес медицина қызметінің дамуына ықпал етужәне олардың құқықтарын қорғау, қазіргі заманғы озық технологияларды енгізуге ықпал ету болып табылады. Қоғамдық бірлестікке Қызылорда облысында тұратын медицина қызметкерлері, бұл жарғыны мойындайтын және қоғам жұмысына қатысатын ынталы адамдар мүше бола алады. Мүшелікке қабылдау кезінде медициналық мекемеде жұмыс істейтіндігі жөніндегі анықтама, медициналық жоғары және орта оқу орнын бітіргендігі туралы диплом мен жеке куәліктің көшірмесін тапсыру қажет.
Қоғамдық бірлестікжанынан«Сыр медицинасы» атты облыстық медициналық басылым жарық көре бастады. Қазақ және орыс тілдерінде шығатын сегіз беттік газет айына екі рет оқырманның қолына тиеді. Онда медицина қызметкерлерінің мақалалары, осы саладағы айтулы оқиғалар мен жаңалықтар, медицина мамандығының майталмандары туралы материалдар жарияланатын болады.
– Құрметті әріптестер үнемі демесек те көп жағдайда халық науқас көз жұмған жағдайда не болмаса өзге де келеңсіздік туған сәтте дәрігерлер қауымын, яғни сіз бен бізді күстаналап жатады. Реніштерін білдіріп, қоғамда түрлі теріс пікірлердің қалыптасуына себепші болады. Заң орындарына шағымданып, әділдік іздейді. Осы орайда дәрігердің де құқығын қорғап, сөзін тыңдайтын бір жанның болғаны дұрыс ғой. Міне осы себепті де біз қоғамдық бірлестіктің жұмысын қолға алдық. Сіздерді алдағы уақытта бірлесіп жұмыс істеуге шақырамын,- деді қоғамдық бірлестіктің төрағасы Мұхтар Беисов.
Кездесу барысында облыстық онкологиялық орталық директорының орынбасары Кәрібай Төлеутайұлы «Көзбен көріп, қолмен сипап, қатерлі ісікке күдіктенуге болатын науқастардың алғашқы белгілері» тақырыбында баяндама оқыса, «Сыр медицинасы» газетінің бас редакторы, Қазақстан Республикасы денсаулық сақтау ісінің үздігі Серікбай Смағұлұлы психологиялық тренинг сабағын жүргізді. Сонымен бірге «Қызылорда облысы медицина қызметкерлерінің қауымдастығы» қоғамдық бірлестігінің төрағасы Мұхтар Беисов «Апаттар медицинасының теміржол госпитальдары» акционерлік қоғамы филиалы Қазалы теміржол аурухансының бас дәрігері Құбыл Ршымбетовтың кеудесіне «Сыр медицинасының үздігі» төсбелгісін тақты.
Суретте: «Қызылорда облысы медицина қызметкерлерінің қауымдастығы» қоғамдық бірлестігінің төрағасы Мұхтар Беисов Құбыл Ршымбетовке «Сыр медицинасының үздігі» төсбелгісін тапсыруда.
Ұлболсын ТАЛАПБАЕВА
«Қазалы» газеті
https://baq.kz/kk/news/regmedia/regmedia-82615
Ақ халатты абзал жандарға құрмет көрсетілді - Қызылорда облысы (ФОТО)
ҚЫЗЫЛОРДА. ҚазАқпарат - 19 маусымда Қазалы ауданында Медицина қызметкерлері күні қарсаңында денсаулық сақтау саласының қызметкерлері, ардагер-дәрігерлер және жаңашыл медиктерге арналған мерекелік шара өтті, - деп хабарлады аудандық әкімдіктің баспасөз қызметінен.Салтанатты шарада аудан әкімі Бахыт Жаханов: «Медицина саласындағы өзгерістерді, тың жаңалықтарды халыққа кеңінен түсіндіріп, насихаттай білуіміз керек. Ол үшін барлық күш жігерімізді жұмсауға тиіспіз. Ауру азабының дертіне шипа табу, көкейіне үміт отын жағу тек сіздердің ғана қолдарыңыздан келеді. Сондықтан халық денсаулығын сақтау мен нығайтуда, дені сау, рухы таза ұрпақ тәрбиелеуде сіздерге артар сенім мен жауапкершілік жүгі аса жоғары. Осы қиын да жауапты еңбектегі толымды табыстарыңыз үшін баршаларыңызға зор алғысымды білдіремін», - деп бірқатар сала қызметкерлерін алғыс хаттармен марапаттады.
Бұл мақсатта былтырғы жылы аудандық ауруханаға 2 млрд-тан астам қаржы қаралған. Осы бөлінген қаржылардан материалдық техникалық жабдықтар, 8 санитарлық автокөлік және жаңа заман талабына сай медициналық аппараттар алынды. Сонымен қатар емханалардың ішкі, сыртқы жөндеу жұмыстары, абаттандыру, су жинау, жылу жүйесін жөндеу жұмыстары жүргізілді.
Денсаулық сақтау саласын халықаралық стандарттарға сәйкестендіру мақсатында көптеген істер қолға алынды. Осы бағытта ауданымызда биылғы жылға дейін 12 дәрігерлік емхана, 7 медициналық пункт заман талабына сай жаңа ғимарат салынып, құрал-жабдықтармен жаңартылды. Сондай-ақ, әр түрлі деңгейде эндовидеоскопиялық хирургиялық аппаратпен көптеген ота жасалып, қаншама науқастардың өмірін сақтап қалуға қол жеткізді. Сондай-ақ, компьютерлік томография бөлімшелерін ашудың арқасында ауруды ерте анықтауға мүмкіндік туды. Осы жаңа жүйе бойынша аурудың алдын алу, халықаралық стандарттарға сай емдеу тәсілдерін енгізу нәтижесінде жалпы аурушаңдық көрсеткіші 2,9 пайызға төмендесе, ана өлімі мүлдем тіркелмеген. Және туберкулез аурушаңдығы азайып, індеттік ахуал жақсара түсті.
Келер жылы ауданда заманауи 150 орындық аурухана салу жоспарлануда. Сондай-ақ, барлық емдеу нысандарына жаңадан материалдық-техникалық құрал-жабдықтар, заман талабына сай медициналық аппараттарымен қамтамасыз етілу жоспарлануда.
http://inform.kz/kaz/article/2788391
Филиалда медицина қызметкерлері күнінің атап өтілуі (фото)
Адам өмірін ұзартуға септігін тигізіп, ажалдан арашалаушы дәрігер мамандығын халқымыз ежелден қастерлеп, қадірлеген. Елеулі еңбектеріңіз ерекше құрмет пен сенімге ие. Себебі сіздерді әрқашан жоғары жауапкершілік, халыққа қызмет жасау,көмекке зәру жандарға қол ұшын беруге даяр тұру сияқты қасиеттер ерекшелендіріп тұрады.
Қазақстан Республикасының Президенті Н.Ә.Назарбаев кәсіптеріңіздің беделін арттыру, тиімді еңбек етуге қажетті барлық жағдайларды туғызу үшін көп жағдай жасауда. Ұлт саулығы, денсаулық сақтау жүйесін жетілдіру, медициналық қызмет көрсету сапасын арттыру мәселелері мен мемлекеттік саясаттың басым бағыттарына айналды. Елбасымыздың «Қазақстан жолы-2050: Бір мақсат, бір мүдде, бір болашақ» атты Жолдауында денсаулық сақтау саласындағы басты басымдық –алғашқы медициналық санитарлық көмекті дамыту мақсаты қойылды.
Дәрігерлер қауымының өңіріміздегі денсаулық сақтау саласын дамытуға қосқан үлесі ұшан-теңіз. Бүгінгі таңда денсаулық сақтау жүйесін реформалауға үлкен талпыныс жасалуда. Мемлекет басшысы Н.Ә. Назарбаевтың бес институттық реформасын жүзеге асыруға бағытталған 100 нақты қадамы соның айқын көрінісі. Ондағы ортақ мақсатымыз медициналық көмекті қолжетімді, дәрігерлік қызметті сапалы ету. Емдеу мен диагностика жасаудың тың технологиялары енгізіліп жатыр.
Өткен жылдың соңында, биыл күрделі аппараттар: екі УДЗ аппараты, стоматологиялық аппарат, екі ота жасау столы, оның біреуі R- негативті стол, екіншісі «С –дуга» рентген диагностикалық аппараты, өкпені жасанды демалу аппараты, тропонин анықтау аппараты, екі гематологиялық анализатор алынды.
Осы орайда Қазалы теміржол ауруханасы бойынша көптеген іс-шаралар атқарылды. Атап айтқанда, компьютерлік томограф аппаратымен 3 мыңнан астам тексерулер, эндовидеохирургиялық комплекс арқылы 47 лапароскопиялық ота, лизинг жолымен алынған «С –дуга» рентген диагностикалық аппараттың көмегімен бірнеше травматологиялық-диагностикалық зерттеулер, УДЗ аппаратымен стационарлық науқастарға ақысыз қызмет көрсетіліп,2014 жылы 4779 зерттеулер, оның ішінде 55 эхокардиография, 2015 жылдың 5 айында 1929 кардиография жүргізілді, бүйрек жетіспеушілігі бар науқастарға гемодиализ бөлімінде 5 аппаратпен 200 мыңға жуық емшара жасалды. Жансақтау бөліміне өкпені жасанды желдету аппараты, пульсоксиметрлер, жіті коронарлық синдромдарын, инфаркт белгілерін ерте анықтайтын тропанин экспресс-әдіс анализаторы және 15 параметрлі биохимиялық анализаторлары, ингаляциялық наркоз аппараттары қолданылып, тәулік бойы кезекшілік ұйымдастырылды. Қабылдау, жансақтау, терапия бөлімдері мен ЭКГ-кабинетіндегі 3 және 6 арналы 4 электрокардиографпен жұмыс істеуді әрбір кезекші мейіркеш меңгерген. Арнайы дайындықтан өтіп, қажетті аппаратурамен қамтамасыз етілген тәжірибелі маман-нейрохирургтар компьютерлік томографтың көмегімен науқастардың бас ми қан тамырларының ауруларын анықтап, күрделі нейрохирургиялық оталар жасады, барокамера, плазмаферез жұмысы жалғасын табуда.
Физиотерапиялық бөлімше қосымша жаңа типті биоптрон, аяқ- қол- бас уқалайтын массажерлер, мойын-кеуде-бел омыртқаларын созғыш, Бернар тогы, электроұйқы, акупунктура және оттегі коктейль аппаратураларымен қамтамасыз етілген.
Сонымен бірге аурухана мамандарының кәсіби біліктілігін арттыруға үлкен көңіл бөлінуде. Биылғы жылдың өзінде 48 маман, оның ішінде 13 дәрігер және 35 мейіркеш қайта даярлықтан және білімін жетілдіруден өтті.
Атап айтатын болсақ қайта даярлықтан өткен мамандар: нейрохирург (ересектер, балалар), гирудотерапевт, трансфузиолог, дерматовенеролог, эндокринолог, эндоскопист, УДЗ дәрігері, балалар невропатологы, дәрігер балалар хирургы, дәрігер педиатр.
Білімін жетілдірген мамандар: дәрігер акушер-гинеколог, дәрігер стоматолог, дәрігер хирург, кардиолог (ересектер, балалар), жалпы тәжірибиелі дәрігер, дәрігер терапевт, жүректі УДЗ, баланың туа бітті ақауларын УДЗ арқылы зерттеу дәрігері, барокамера маманы, пациентті қолдау және аудит қызметі маманы, инженер, есепшілер және орта буын қызметкерлері- физиотерапия мейірбикесі, хирургия мейірбикесі, классикалық массаж, бактериологиялық зертханашы, жалпы тәжірибелі мейірбике, жалпы тәжірибелі фельдшер, акушерка, ЭКГ мейірбикесі.
Мекемедегі 42 дәрігердің 50,5 пайызының, 160 орта буын медицина қызметкерінің 31,4 пайызының біліктілік санаттары бар.
«Саламатты Қазақстан» мемлекеттік бағдарламасы сәтті іске асуда. Тіркеудегі халық саны 21788 дейін өсті, 3 жалпы тәжірибелік дәрігерлік, 5 терпевтік, 4 педиатрлық және 3 өндірістік аймақтар халыққа қалтқысыз қызмет етуде.
«Бірыңғай ұлттық денсаулық сақтау жұйесі» бағдарламасы бойынша осы жылдың 5 айында аурухананың 100 төсектік тәуліктік бөлімінен 1554 науқас, ал стационар алмастырғыш көмек бөлімінен 650 науқас емделіп шықты.
Аурухананың материалдық-техникалық базасын одан ары нығайту мақсатында ауқымды жұмыстар атқарылды. Аурухана, емхана негізгі ғимараттарының сыртқы қабырғалары 1500 ш.м. сыланып, әрленіп және кафельденді, бөлімшелерде ағымдағы жөндеу жұмыстары жүргізілді, қол жуғыш крандары ауыстырылып,бөлімшелерге ыстық су кіргізілді, екі сұйық отынмен жылытылатын жылу қазандығы және үш автоматты кір жуғыш машина жаңадан орнатылды.
Мекеменің заманауи құралдармен жабдықталуы, жаңа медициналық технологиялардың енгізілуі тұрғындарға медициналық қызмет көрсету сапасын арттыруға, әр отбасының, әр азаматтың денсаулығын жақсартуға оң ықпал етуде.
Алдағы уақытта да халыққа көрсетілетін медициналық қызметтің сапасын және мекеменің материалдық-техникалық базасын одан ары жақсарту бағытындағы іс-шаралар өз жалғасын табады. «Нұрлы жол- болашаққа бастар жол» бағдарламасына сәйкес кіші кәсіпкерді қолдау аясына байланысты емханаға қосымша диагностикалық ғимарат салынып беріледі, флюорокабинеттерге сандық флюорографиялық аппараттар орнатылады, отоларингология, офтальмология және гинекология кабинеттеріне диагностикалық-емдеу комплекстік аппараттары қойылады, мамандарды қайта даярлау және олардың білімін жетілдіруге қаржы бөлінеді, негізгі және шаруашылық ғимараттарының жөндеу жұмыстары жалғасады.
Әріптестеріміздің көп жылғы қажырлы еңбектерінің нәтижелері жоғарғы басқару, жергілікті атқару және саяси-қоғамдық органдары тарапынан ескеріліп, медицина қызметкерлерінің мерекесі қарсаңында ҚР Денсаулық сақтау және әлеуметтік даму министрлігінің 28.05.2015 жылғы № 400 бұйрығымен филиал директорының орынбасары Дәрібай А.А. «Денсаулық сақтау ісіне қосқан үлесі үшін» төсбелгісімен, 13 қызметкер, оның ішінде: Байбазарова Ш.К.- аймақтық дәрігер педиатр, Сейтмамбет Қ.Қ.- реанимация бөлімінің мейірбикесі, Мырзагулова Г.Т.- балалар бөлімінің мейірбикесі «Апаттар медицинасының теміржол госпитальдары» Акционерлік қоғамының құрмет грамотасымен, Утеулиев Ж.- дәрігер стоматолог, Ерниязова З.- жалпы тәжірибиелі дәрігер, Алмагамбетова Р.- қабылдау бөлімінің жауапты мейірбикесі, Уриналиева Г.- емхана бөлімі хирургия бөлмесінің мейірбикесі Қызылорда облыстық денсаулық сақтау басқармасының құрмет грамотасымен, Куанышбаев Ж.- дәрігер анестезиолог реаниматолог, Сырымбаева Ф.- есепші Қызылорда бөлімшелік теміржолшылар кәсіподағының құрмет грамотасымен марапатталып, Досбергенова Ж.- аймақтық дәрігер педиатр, Орманова С.- емхана мейірбикесі Қазалы ауданы әкімінің алғыс хатына, Елюбаева И.- неврология бөлімінің жауапты мейірбикесі, Оржанова Г.- емхана бөлімінің аймақтық мейірбикесі «Нұр Отан» партиясының алғыс хатына ие болды. Сонымен бірге аурухана әкімшілігі мен кәсіподағы тарапынан 35 қызметкер 5000-15000 тенге аралығында ақшалай сыйлықпен, 15 қызметкер құрмет грамотасымен, 40 қызметкер «Қазалы» газетінің басылымына тегін жазылумен марапатталды.
Құрметті әріптестер!
Біздің биылғы кәсіби мерекеміз Қазақстан халықтарының Ассамблеясының 20 жылдығы, Ұлы жеңістің 70 жылдығы, еліміздің Конституциясының 20 жылдығы және Қазақ хандығының 550 жылдығы сияқты тарихи маңызды оқиғалардың қарсаңына тұспа-тұс келіп отыр.
Біздің әрқайсысымыз өмір мен денсаулықтан артық құндылық жоқ екенін түсінеміз. Дәл осы баға жетпес құндылықты сақтап қалуға негізделетін аса жоғары жауапкершілік Сіз бен бізге жүктеледі.
Қазақта «Тәні саудың жаны сау» аталы сөз бар. Сондықтан бүгінгі таңда аурудың алдын алу біз үшін өте өзекті болып табылады. Бұл жолда Сіздер аянбай тер төгіп келесіздер. Сіздердің шипалы қолдарыңыздың арқасында өмірден күдер үзген талай науқас жарық дүниеге қайта оралды. Бүгінгі мерекеде осындай игілік нұрын сеуіп, халық денсаулығын жақсарту жолындағы еңбектеріңіз үшін алғысымды білдіргім келеді. Сөзсіз Сіздердің толассыз қызметтеріңіздің өлшемінде қуанышымен қауышқан талай адамдардың тағдыры тұр. Алдағы уақытта адам тәнінің қиналысы мен қасіретін жүрегімен сезіне білетін Сіздерді халыққа қалтқысыз еңбек етеді деп сенемін.
Барлық медицина қызметкерлері мен өз әріптестерімді кәсіби төл мерекелерімен шын жүректен құттықтап, дендеріне саулық, баянды бақыт, еңбекте табыс, төзімділік пен күш-қайрат, отбасыларына береке-бірлік, амандық тілеймін. Игілікті істеріңізге деген адалдықтарыңыз, азаматтардың денсаулығы үшін аянбай жасап отырған қызметтеріңіз баянды болсын.
Құрметпен, Құбыл Ршымбетов,
«Апаттар медицинасының теміржол госпитальдары» Акционерлік қоғамының филиалы- Қазалы теміржол ауруханасының директоры
Заманауи рентген аппаратымен толықты
Соңғы жылдары
ауданымыздағы емдеу мекемелері заманауи құралдармен жабдықталып жатыр. Бұрын
қазалылықтар компьютерлік тексерулерден өту үшін өзге өңірлерге баратын болса, қазір
бұл мәселе шешілді. Бүгінгі таңда білікті мамандар еңбек ететін «Апаттар
медицинасының теміржол госпитальдары» акционерлік коғамының филиалы Қазалы теміржол ауруханасы науқастарға ем-дом жасап, көптің
көңілінен шығып жүр.
Жақында ҚР Денсаулық сақтау ісінің үздігі ҚұбылРшымбетов басқаратын аурухана оңтүстік кореялық заманауи рентген аппаратымен толықты. Енді травматолог дәрігерлер түрлі дәрежедегі сынықтарға отаны ауданымызда да ешбір кедергісіз жасай береді. Бір айта кетерлігі, құны 40 млн теңге тұратын мұндай аппарат, республикамыздың өзге аудандарында жоқ екен.
Аталмыш рентген аппараты науқастарды қазіргі заманға сай әдістермен емдеуге арналған. Емделуші аппаратқа қаралған соң кескіндемесі бірден копьютерге түседі. Бұдан былай медицина қызметкерлері бұрынғы ескі аппарат шығарған пленкаларды тасымалдап, уақытты текке кетірмейді. Жаңа рентген аппараты электрондық нұсқа арқылы файлды қажет жерге дереу жібере алады. Науқастардың бүгінгі күн талаптарына толық сәйкес келетін қондырғы арқылы ем алуына мүмкіндік туды.
Жоғары категориялы дәрігер, травматолог-ортопед Аманкелді Қанатов соңғы үлгідегі шығарылған заманауи құрал-жабдықты пайдаланып, Қызылорда қаласынан келген азаматқа ота жасады. Науқас осыдан екі ай бұрын қолын сындырып алып, дәрігерлердің көмегіне сүйінген болатын. Алайда, салынған сүйек қисық бітіп, қолдың нерв тамырларын қысқан. Білікті маман жоғары категориялы Сәдуақас Ахмет, уролог Ерболат Жасановпен бірге жаңа рентген аппаратының көмегімен сынған қол сүйектерін қайта қалпына келтірді.
Бұл туралы ота жасаушы травматолог дәрігер Аманкелді Қанатовпен тілдескенімізде: «Техниканың дамыған кезеңі. Жарақаттардың көбі жол-көлік апаттарынан болып жатады. Көктем-қыс мезгіліндегі көктайғақтың кесірі тағы бар. Бұған абайсызда алған жарақатты қосыңыз. Кейбір жарақаттар жеңіл болса, кейбірі аса ауыр. Бірақ, сырқаттың күрделілігіне қарамай, ем жасау керек. Науқастың қатарға қосылуы үшін барымызды саламыз. Күрделі оталарды жасау кезінде заманауи техникалардың көмегі көп тиеді»,- деп ағынан жарылды.
Жеңісбек Айымқұлов
«Қазалы» газетінің тілшісі.
